///////畫封面了/////////
用了CMYK來post，顏色偏了呢！
為了看真實的顏色，請大家週五買一本看(炸)
好！《熱血少年》第⑥期，如箭在弦準備出擊勒！
尤記得初初出版呢本《熱血少年》嗰陣，全世界都唔睇好！尤其係出咗「創刊號」，某D觀眾直頭畀入面畫稿嘅水平嚇到腳軟！（牛佬都有Ｄ腳軟！）
之但係咁喎──《熱血少年》策劃人黃洋達就好淡定喎！經常笑笑口咁講：「少年漫畫有Ｄ咁嘅水準，唔出奇吖！」係真唔係呀？
事實証明，黃洋達講得一Ｄ都冇錯！事關本書出吓一期，出吓又一期．．．直到目前為止，我哋一個仙都冇蝕過！咁你哋話勒──係咪算係咁？
當然，有Ｄ人可能話：「你哋盤數計得小心啫！」咁就梗係啦！條數計得小心，先至可以令成本書有得營運落去！有得營運，先有時間畀班港漫新晉慢慢成長，茁壯！
呢，唔駛話乜，依家已經「蒲」咗幾個好嘢出嚟！一個係門小雷、一個係惠昌、一個係ＤＯＬＬＹ！
呢三位畫手，之前係好少港漫讀者認識嘅，依家因為佢哋喺《熱血少年》雙周連載，開始慢慢多人知道佢哋個「朵」勒！除此，佢哋嘅作品亦隨住港漫急速嘅製作模式，水準進步神速！
唔信？未買過《熱血少年》嘅朋友不妨試吓捧場──門小雷嘅《小雷的情書》，惠昌嘅《香港獨立戰爭》同埋ＤＯＬＬＹ嘅《咒法和弦》，比起傳統港漫，水準一Ｄ都唔遜色！尤其係《小雷的情書》，更有過之而無不及！
嗱！出咗五六期已經有咁嘅成績，算係咁勒啩！如果再去到十零廿期，肯定會多幾個新晉跑出嚟！依家，部分未跑出嚟嘅新晉，只係尚未習慣期刊模式出版，一旦適應．．．肯定隻隻都好似猛虎出柙咁樣，「噓噓聲」湧出嚟！
好，唔講太多，留返小小神秘感，等你哋自己買本《熱血少年》嚟親身感受！嗰種感覺，係同閱讀傳統港漫截然不同嘅！
今個禮拜五，就會推出架勒！睇實咯噃！
Search